ட்ரெண்டிங்

காவிரி நீர் விவகாரத்தில் தமிழக அரசு மெத்தனம்! – EPS குற்றச்சாட்டு

 

காவிரி நீரைப் பெற நடவடிக்கை இல்லை; தமிழக அரசு செயலற்ற அரசாக உள்ளது!” – எடப்பாடி பழனிசாமி விமர்சனம்

சேலம் மாவட்டம் ஓமலூரில் நடைபெற்ற அதிமுக நிர்வாகிகள் ஆலோசனைக் கூட்டத்திற்குப் பின்னர் செய்தியாளர்களைச் சந்தித்த அதிமுக பொதுச்செயலாளர் எடப்பாடி பழனிசாமி:-

காவிரி நீர் விவகாரம் மற்றும் வாக்காளர் பட்டியல் சிறப்புத் தீவிரத் திருத்தப் பணி தொடர்பாகத் தனது கருத்துகளைத் தெரிவித்தார்.

காவிரி நீரைப் பெற முயற்சி இல்லை:-

மேட்டூர் அணையில் இருந்து டெல்டா பாசனத்திற்காகத் திறக்கப்படும் தண்ணீர் நிறுத்தப்பட உள்ள நிலையில், தமிழகத்திற்குக் கிடைக்க வேண்டிய காவிரி நீரைப் பெற தமிழக அரசு உரிய முயற்சிகளை மேற்கொள்ளவில்லை என்று எடப்பாடி பழனிசாமி குற்றம்சாட்டினார்.

உச்ச நீதிமன்றத் தீர்ப்பின்படி ஒவ்வொரு மாதமும் தமிழகத்திற்கு வழங்கப்பட வேண்டிய காவிரி நீரின் அளவு தெளிவாகக் குறிப்பிடப்பட்டுள்ளதாகத் தெரிவித்த அவர், அந்தத் தீர்ப்பை அடிப்படையாகக் கொண்டு தமிழகத்திற்கான நீரைப் பெற அரசு நடவடிக்கை எடுக்க வேண்டும் என்றார்.

மேலும், பிரதமர் சென்னைக்கு வந்தபோதுகூட காவிரி நீர் பிரச்சினை தொடர்பாக முதலமைச்சர் விஜய் அவரிடம் வலியுறுத்தியிருக்கலாம் எனக் குறிப்பிட்டார்.

தமிழகத்திற்கு இன்னும் 12 டிஎம்சி தண்ணீர் நிலுவையில் இருப்பதாகக் கூறிய எடப்பாடி பழனிசாமி, அந்த நீரைப் பெறுவதற்கான கோரிக்கையை முதலமைச்சர் முன்வைக்கவில்லை என்றும், திட்டமிடல் இல்லாத அரசின் செயல்பாடுகளால் விவசாயிகள் பாதிக்கப்படுவதாகவும் விமர்சித்தார்.

வாக்காளர் பட்டியல் திருத்தப் பணியில் குற்றச்சாட்டுகள் குறித்து பதில்:-

வாக்காளர் பட்டியல் சிறப்புத் தீவிரத் திருத்தப் பணி தொடர்பாக மற்ற கட்சிகள் முன்வைக்கும் குற்றச்சாட்டுகள் குறித்து செய்தியாளர்கள் கேள்வி எழுப்பினர்.

இதற்குப் பதிலளித்த எடப்பாடி பழனிசாமி, வாக்காளர் பட்டியல் திருத்தப் பணிகள் திமுக ஆட்சிக் காலத்தில் அப்போதைய மாவட்ட ஆட்சியர்கள் தலைமையில் நடைபெற்றதாகத் தெரிவித்தார்.

ஒவ்வொரு கட்சியையும் சேர்ந்த பிரதிநிதிகள் திருத்தப் பணிகளின்போது அதிகாரிகளுடன் இருந்ததாகவும், நீண்ட காலமாக வாக்காளர் பட்டியலில் இடம்பெற்றிருந்த உயிரிழந்தவர்களின் பெயர்கள் நீக்கப்பட்டதாகவும் கூறினார்.

வாக்காளர் பட்டியலில் பெயர்கள் நீக்கப்பட்டவர்கள் தொடர்பாக உரிய வாய்ப்புகள் வழங்கப்பட்டதாகவும் அவர் தெரிவித்தார்.

தேர்தல் நடைபெற்று, ஆட்சியும் அமைந்துவிட்ட நிலையில், தற்போது வாக்காளர் பட்டியல் திருத்தப் பணியைக் குறை கூறுவது பொருத்தமானதல்ல என்றும் எடப்பாடி பழனிசாமி கூறினார்.

அரசியல் விவகாரங்களில் தொடரும் விமர்சனங்கள்:-

மின்சாரக் கொள்முதல், விலைவாசி உயர்வு, இடைத்தேர்தல் முடிவுகள், கட்சி நிர்வாகிகள் மாற்றுக் கட்சியில் இணைவதாக வெளியான தகவல்கள் மற்றும் காவிரி நீர் விவகாரம் எனப் பல்வேறு பிரச்சினைகள் குறித்து தமிழக அரசை எடப்பாடி பழனிசாமி கடுமையாக விமர்சித்தார்.

ஓமலூரில் நடைபெற்ற ஆலோசனைக் கூட்டத்தில் அதிமுகவின் அடுத்தகட்ட கட்சி நடவடிக்கைகள் குறித்தும் ஆலோசிக்கப்பட்டது.