மேட்டூர் அணைக்கு வரும் நீர்வரத்து குறைந்துள்ளதால், அணையின் நீர்இருப்பு தொடர்ந்து சரிவடைந்து வருகிறது. இதனால் டெல்டா மாவட்ட விவசாயிகள் கவலை அடைந்துள்ளனர்.

கர்நாடக மாநிலத்தில் காவிரி நீர்ப்பிடிப்பு பகுதிகளில் போதிய மழை இல்லாததால், மேட்டூர் அணைக்கு வரும் நீர்வரத்து குறைந்துள்ளது.இன்று காலை நிலவரப்படி அணைக்கு வினாடிக்கு 1,212 கனஅடி நீர் வந்து கொண்டிருக்கிறது. 

அணையிலிருந்து குடிநீர் தேவைக்காக மற்றும் கால்வாய் பாசனத்திற்காக நீர் திறக்கப்பட்டு வருகிறது.மேட்டூர் அணையின் மொத்த நீர்மட்டம் 120 அடி ஆகும். தற்போது அணையின் நீர்மட்டம் 90 அடியாகவும், நீர்இருப்பு 35.38 டி.எம்.சி. ஆகவும் உள்ளது. கடந்த ஆண்டுடன் ஒப்பிடுகையில் இந்த ஆண்டு நீர்வரத்து குறைவாக இருப்பதாக அதிகாரிகள் தெரிவித்துள்ளனர்.

மேலும், அணையிலிருந்து காவிரி டெல்டா பாசனத்திற்காக திறக்கப்படும் நீரின் அளவும் கண்காணிக்கப்பட்டு வருகிறது. கர்நாடகாவில் தென்மேற்கு பருவமழை தொடங்கிய பின்னரே நீர்வரத்து அதிகரிக்கும் என எதிர்பார்க்கப்படுகிறது.