தெற்கு ரயில்வே கோட்டத்திற்கு உட்பட்ட வழித்தடத்தில் இயக்கப்படும் வந்தே பாரத் எக்ஸ்பிரஸ் ரயில்களில் அதிக பயணிகள் பயணம் செய்து புதிய சாதனை பதிவாகியுள்ளதாக தெற்கு ரயில்வேயின் மக்கள் தொடர்பு அலுவலர் தெரிவித்துள்ளார்.

அதன்படி, நடப்பு நிதியாண்டில் செப்டம்பர் 13- ஆம் தேதி வரை டாக்டர் எம்ஜிஆர் சென்னை சென்ட்ரல்- கோயம்புத்தூர் வந்தே பாரத் எக்ஸ்பிரஸ் ரயிலில் (ரயில் எண் 20643) பயணித்தவர்களின் விகிதம் 108.23% ஆகவும், கோயம்புத்தூர்- டாக்டர் எம்ஜிஆர் சென்னை சென்ட்ரல் வந்தே பாரத் எக்ஸ்பிரஸ் ரயிலில் (ரயில் எண் 20644) பயணித்தவர்களின் விகிதம் 104.60% ஆகவும் உள்ளது.

அதேபோல், காசர்கோடு- திருவனந்தபுரம் சென்ட்ரல் வந்தே பாரத் எக்ஸ்பிரஸ் ரயிலில் (ரயில் எண் 20633) பயணித்தவர்களின் விகிதம் 177.45% ஆகவும், திருவனந்தபுரம் சென்ட்ரல்- காசர்கோடு வந்தே பாரத் எக்ஸ்பிரஸ் ரயிலில் (ரயில் எண் 20634) பயணித்தவர்களின் விகிதம் 171.76% ஆகவும் உள்ளது.

டாக்டர் எம்ஜிஆர் சென்னை சென்ட்ரல்- மைசூரு வந்தே பாரத் எக்ஸ்பிரஸ் ரயிலில் (ரயில் எண் 20607) பயணித்தவர்களின் விகிதம் 130.48% ஆகவும், மைசூரு- டாக்டர் எம்ஜிஆர் சென்னை சென்ட்ரல் வந்தே பாரத் எக்ஸ்பிரஸ் ரயிலில் (ரயில் எண் 20608) பயணித்தவர்களின் விகிதம் 112.99% ஆகவும் உள்ளது. இவ்வாறு தெற்கு ரயில்வேயின் மக்கள் தொடர் அலுவலர் வெளியிட்டுள்ள செய்திக் குறிப்பில் தெரிவிக்கப்பட்டுள்ளது.