ஆடி திருவிழா: சேலம் அம்மாபேட்டை செங்குந்தர் மாரியம்மன் கோவில் தேரோட்டம் கோலாகலம்

சேலம், ஆக. 6:

ஆடி மாத திருவிழாவை முன்னிட்டு சேலம் மாநகரில் உள்ள மாரியம்மன் கோவில்களில் பக்தி பரவசத்துடன் திருவிழா நிகழ்ச்சிகள் நடைபெற்று வருகின்றன. குறிப்பாக, சேலம் அம்மாபேட்டை செங்குந்தர் மாரியம்மன் கோவிலில் நடைபெற்ற தேரோட்டம் ஆயிரக்கணக்கான பக்தர்களின் பங்கேற்புடன் கோலாகலமாக நடைபெற்றது.

ஆடி மாதத்தை முன்னிட்டு சேலத்தின் பிரசித்தி பெற்ற கோட்டை மாரியம்மன் கோவில் உள்ளிட்ட பல்வேறு அம்மன் கோவில்களில் தீமிதித்தல், அலகு குத்துதல், கரகாட்டம், வண்டி வேடிக்கை உள்ளிட்ட பாரம்பரிய நிகழ்ச்சிகள் நடைபெற்று வருகின்றன. இதன் தொடர்ச்சியாக அம்மாபேட்டை செங்குந்தர் மாரியம்மன் கோவிலில் நடைபெற்ற தேரோட்ட விழா பக்தர்களை வெகுவாகக் கவர்ந்தது.

வண்ண மலர்களால் அலங்கரிக்கப்பட்ட மரத்தேரில் செங்குந்தர் மாரியம்மன் எழுந்தருள, ஆயிரத்துக்கும் மேற்பட்ட பக்தர்கள் வடம்பிடித்து தேரை இழுத்தனர். காந்தி மைதானம் பகுதியில் தொடங்கிய தேரோட்டம் நகரின் முக்கிய வீதிகள் வழியாக வலம் வந்தது.

தேரோட்டம் சென்ற வழியெங்கும் பொதுமக்கள் மற்றும் பக்தர்கள் தேங்காய் உடைத்து, கற்பூரம் ஏற்றி, மலர் தூவி அம்மனை வழிபட்டனர். பக்தர்களின் பக்தி முழக்கங்களால் திருவிழா பகுதி முழுவதும் ஆன்மிகச் சூழல் நிலவியது.

தேரோட்ட விழாவையொட்டி கோவில் நிர்வாகம் மற்றும் விழாக்குழுவினர் தேவையான ஏற்பாடுகளை செய்திருந்தனர். பக்தர்களின் பாதுகாப்பு மற்றும் போக்குவரத்து ஒழுங்கை உறுதி செய்ய காவல்துறையினரும் பாதுகாப்பு பணியில் ஈடுபட்டிருந்தனர்.