சேலம் வழியாகச் செல்லும் 12 ரயில் சேவைகளை தெற்கு ரயில்வே ரத்துச் செய்துள்ளதாக சேலம் கோட்டம் அறிவித்துள்ளது.

இது குறித்து சேலம் ரயில்வே கோட்டம் வெளியிட்டுள்ள அறிவிப்பில், தெலுங்கானா மாநிலத்தின் ஹஸன்பார்த்தி (Hasanparthi)- உப்பல் (Uppal) ரயில் நிலையங்களின் மூன்றாவது லைனில் தொழில்நுட்பப் பணிகள் மேற்கொள்ளவிருப்பதால், சேலம் வழியாகச் செல்லும் கீழ்க்கண்ட 12 ரயில் சேவைகள் ரத்துச் செய்யப்பட்டுள்ளது.

அதன்படி, டிசம்பர் 30, ஜனவரி 06 ஆகிய தேதிகளில் எர்ணாகுளம்- ஹஸ்ரத் நிஜாமுதீன் எக்ஸ்பிரஸ் ரயில், ஜனவரி 02, ஜனவரி 09 ஆகிய தேதிகளில் ஹஸ்ரத் நிஜாமுதீன்- எர்ணாகுளம் எக்ஸ்பிரஸ் ரயில் சேவைகள் ரத்துச் செய்யப்பட்டுள்ளது. அதேபோல், டிசம்பர் 31, ஜனவரி 07 ஆகிய தேதிகளில் கோவை- ஹஸ்ரத் நிஜாமுதீன் கொங்கு எக்ஸ்பிரஸ் ரயில் சேவையும், ஜனவரி 03, ஜனவரி 10 ஆகிய தேதிகளில் ஹஸ்ரத் நிஜாமுதீன்- கோவை கொங்கு எக்ஸ்பிரஸ் ரயில் சேவையும், ஜனவரி 01, 08 ஆகிய தேதிகளில் ப்ரௌனி- எர்ணாகுளம் எக்ஸ்பிரஸ் ரயில் சேவையும், ஜனவரி 05, 12 ஆகிய தேதிகளில் எர்ணாகுளம்- ப்ரௌனி எக்ஸ்பிரஸ் ரயில் சேவையும் ரத்துச் செய்யப்பட்டுள்ளது.

ஜனவரி 02, 09 ஆகிய தேதிகளில் பிளாஸ்ப்பூர்- திருநெல்வேலி எக்ஸ்பிரஸ் ரயில் சேவையும், டிசம்பர் 31, ஜனவரி 07 ஆகிய தேதிகளில் திருநெல்வேலி- பிளாஸ்ப்பூர் எக்ஸ்பிரஸ் ரயில் சேவையும், ஜனவரி 03- ஆம் தேதி கோர்பா- கொச்சுவேலி ரயில் சேவையும், ஜனவரி 01- ஆம் தேதி கொச்சுவேலி- கோர்பா ரயில் சேவையும், ஜனவரி 04, 05. 07, 11, 12 ஆகிய தேதிகளில் கோரக்பூர்- கொச்சுவேலி எக்ஸ்பிரஸ் ரயில் சேவையும், ஜனவரி 02, 03, 07, 09, 10 ஆகிய தேதிகளில் கொச்சுவேலி- கோரக்பூர் ரயில் சேவையும் ரத்துச் செய்யப்பட்டுள்ளது.

ரத்துச் செய்யப்பட்டுள்ள ரயில்களில் பயணிக்க முன்பதிவுச் செய்த பயணிகளுக்கு முழு கட்டணமும் திருப்பி வழங்கப்படும் எனத் தெரிவிக்கப்பட்டுள்ளது.